الاقسام العامة - هنا يمكنك أن تجد مساحة لعبارات الشكر والعرفان.

وهنا نستقبل زورانا بكل الود والصفاء والمحبة

اليوم عندي لكم قصه وقصيده واقعيه.... حدثت لأحد الشباب.... تقول القصه وعلى ذمة الرواي.... انه هذا الشاب واللي اسمه متعب كان يسوق سيارته ومعه خويه ... وفي سياره ثانيه كان أخوه وأمه وأخته ... كلهم متوجهين الى منطقه ثانيه لزيارة أحد أفراد العائله.... متعب كان يسوق كامري... أسرع متعب .... وأختفى عن أنظار أخوه الاكبر اللي كان يسير خلفه.... وماهي الا لحظات حتى سمعو صوت حادث سياره مدوي.... وصلوا الى مكان الحادث ... فاذا بالسياره ومن فيها تحترق... .ركضت الأم والأخت نحو متعب... حاول الاخ الأكبر منعهم.... لكن دون جدوى....المنظر مؤثر بالتأكيد... الأخ والأم والأخت يشاهدون أخاهم يحترق حتى الموت هو وصديقه أما أعينهم وهم عاجزين عن عمل أي شي... نسأل الله الثبات....

لن أطيل عليكم .... الأخ الأكبر لمتعب كتب هذه المرثيه التي أحببت أن أنقلها لكم ....فتفضلوا.... يقول الأخ فيها:





متعب تراك بخاطري مقدر أنساك
ياللي دفنتك وسط بـدر العشيـه
أنسى أنا نفسي لا حـل طريـاك
تذرف دموع العين غصب(ن)عليه
أذكر أنا مجلسك وأذكر سجايـاك
زين الخصال وزين طبع وسجيه
وأذكر علوم(ن) لك وأذكر حلاياك
وأذكر بسمتك يوم تطري عليـه
وضحكتك يوم ودوم تعلو محياك
قرم (ن)كريم(ن) منت راعي رديه
يا ما تجي وتروح وحنا انتظرناك
ولاشفت زولك جاتنـي أريحيـه
وآخر لقانا بالفطور الصبـح ذاك
تضحك وتمزح يا خليلـي عليـه

يا ليتني بالكامري قبـل ممشـاك
وتصير نفسي دون نفسك ضحيه
ويا ليتي نار(ن)ولعت في حشاياك
شبت بجسمي وأتركتـك المنيـه
في وقت دفنك أتسلـى بذكـراك
علّي أوقف دمـع عينـي شويـه
رجعت يم البيت أبحث عن خطاك
وبعد الشفا ترجع جروحي نديـه
أروح للغرفـه وظنـي أبلقـاك
علي أسلي عيني ...بعدك شقيـه
في غرفتك أجلس وأناظر هداياك
وسط الملابس فيه ريحـه زكيـه
وادعي اله الكون يا رب رحماك
ترحم حبيب(ن)لي وترحم خويـه



نسأل الله أن يتغمده بواسع رحمته وأن يلهم أهله الصبر والسلوان....

مــنــقول..